世界杯假球多？
世界杯开战已一周多，朋友圈里照例又传出“假球多”的各种段子，最好玩的当然是“天台上人满为患，明天趁早”的笑话。
不过，说笑归说笑，面对友人来电诉苦，当然不能用天台段子来应付。
友人：娄兄啊，世界杯哪能真格有介许多假球啊啦？连得德国队，唉……
我：老兄稍安勿躁，有话慢慢说……
友人：唉，朋友，侬讲讲看，阿拉一道看德国队介许多年数，对伐？强队里厢德国队永远是最认真格，哪能会得连墨西哥也踢勿过？绝对是假球！
我：墨西哥弗差格，只好讲德国队是自家勿好。一方面轻敌，一方面对对方个反击速度、传接球节奏勿适应，再加上落后以后自家调整反应比较慢。侬讲是伐？
友人：好啦好啦，我覅听侬讲啥技战术分析。侬就讲世界杯到底有假球伐？为啥有介许多？覅讲德国，还有阿根廷与巴西，踢得来啥么事……
我只能呵呵：老兄啊，我当然勿好讲世界杯绝对呒没假球，但是呒没证据，侬就晓得伊拉侪踢假球了？我只好帮侬一场一场分析。阿根廷，1比0领先，马上拨冰岛扳平。接下来点球踢勿进，侬讲哪能办？而且是梅西唉！连得梅西也点球勿进，侬讲说明啥？总归是压力太大、负担太重、精神太紧张咯？而且就是前头一天，C罗帽子戏法，侬讲讲看梅西身廊厢压力多多少少？
友人嘟囔着：个么C罗哪能就踢的进点球？
我：喂，阿哥啊，闲话勿好迭能介讲啊！伊拉两个人相互之间个竞争太激烈了，勿管是场内还是场外。侪是一家头挑一支球队，还要拨媒体、球迷、赞助商所有人盯牢，做人多少吃力？现在是梅西呒没踢进，但是假使世界杯赛程调整一下，梅西提前一天踢进了呢？说勿定就变成C罗压力山大了……
友人：个么为啥人家侪讲世界杯假球多啦？而且世界杯历史廊厢强队输球是多呀……
我：哈哈哈，所以讲世界杯难踢呀！侬想想看，每场比赛侪弄得来像决赛一样，吓人伐？球员格大赛经验又勿是天生就有格，多少球员比赛前头一天兴奋、紧张得来一夜道睏勿着侬晓得伐？对面球队就勿一样了。人家晓得实力有差距，踢勿过侬强队是正常格，随便输也好赢也好，心态非常放松，人个状态就完全两样来……最后还有一点，基本廊厢讲假球多个人侪是输钞票了，对伐？
友人无奈：好吧，你也算是一家之言吧……
